Se dis que l’óulivié, aubre dóu païs dóu soulèu, es nascu’mé la Mieterrano e soun istòri fai qu’un em’aquello de l’umanita. Après lou Deluge la couloumbo aduguè à Nouè la proumiero marco de la vido revengudo sus la terro : un ramèu fres d’óulivié.Se fasié veni’n Sirio, en Fenicio e’n Palestino 3000 an avans Jésus-Crist.En Grèço, aquel aubre counsacra à la divesso Athena, ounour se n’en falié coume lou signau de la pas e de la fraternita. Pèr li vincèire di jo oulimpi se trenavo de courouno’mé de ramèu d’óulivié.Li Grè, quouro coulouniseron li ribo de la Mieterrano, aduguèron l’óulivié de long di costo de Prouvènco, i’a mai de 25 siecle. Pièi, pau à cha pau, se faturè fin qu’i valeio d’Egue e d’Ouvezo, que soun li raro de l’uba de la culturo de l’óulivié. Aquel óulivié s’es asata au climat e au terraire pèr douna la varieta « tanco d’aubre ». Es en 1994 que lis óulivo e l’òli de Nioun daverèron l’apelacioun d’ourigino countouroulado (AOC).L’óulivié buto forç’à la rodo de l’ecounoumio e de l’atiramen touristi dóu païs de Nioun e di Barounié. N’es devengu l’aubre emblemati.Par acò, l’òli d’óulivo, aprouficha dins la cousino, ajud’à garda un cors bèn gaiard : lis acidènt cardiovasculari podon demeni e lou vieiimen ralenti ; d’estùdi recènto l’an prouva. Se i’apoundès lou regime mieterran, acò fara mestié pèr vosto santa.